Edi Rama, Erion Veliaj dhe Republika me vulë atësie…

Nga Arian Galdini

Më 2 nëntor 2026, disa media, duke iu referuar avokatit Plarent Ndreca, raportuan se ministri i Drejtësisë Toni Gogu i kishte përcjellë Veliajt në burgun e Fierit ultimatumin e Ramës: dorëzo mandatin, delego pushtetin, largo avokatin, përndryshe, «do të të kalb në burg».

«Babai politik» paska folur.

Qytetarët të ulin zërin, atësia qenka më e fortë se vota.

Kjo është republika ku popullin e thërrasin të zgjedhë kryetarin, pastaj kryetarit i kujtojnë kush e ka zgjedhur vërtet.

Qyteti paguan Bashkinë.

Familja politike vendos kujt i përket.

Nuk po ndahen përgjegjësitë për Tiranën.

Po negociohet kush emëron, kush firmos, kush trashëgon ndikimin.

«Delegim» quhet ceremonia ku mandati qytetar i dorëzohet kryetarit të PS-së.

Sa pastër, nënshkrimi është i të zgjedhurit, vullneti i pronarit.

As Veliaj nuk bëhet çlirimtar sepse nuk pranon të dalë nga loja.

Kundërshtimi i përjashtimit personal nuk është kundërshtim i sistemit që përjashton qytetarët.

Borxhi i mirënjohjes nuk e shndërron mandatin në peng.

Partia propozon kandidatë, nuk zotëron qytetarë.

Pushteti ushtrohet, nuk trashëgohet.

Rama duhet të largohet.

Por largimi i tij nuk duhet të jetë hapje testamenti.

Tirana nuk kërkon një trashëgimtar më të sjellshëm.

Kërkon të mos trajtohet më si trashëgimi.

Arian Galdini