LRE do t’ia dalë mbanë sepse ka fuqinë e misionit, kthjelltësinë e qëllimit dhe energjinë e besimit!

Nga Gent Sinani

NënKryetar i LRE

Në historinë e popujve, ka çaste kur shfaqen lëvizje që e kapërcejnë logjikën e zakonshme të politikës.

Ato lindin jo si produkt kalkulimesh, por si pasojë e një thirrjeje të brendshme që tejkalon interesat dhe pushtetet e ditës.

Lëvizja Rinisja është një prej këtyre çasteve në historinë e Shqipërisë.

Ajo është shfaqur jo për të plotësuar një boshllëk partiak, por për të dhënë një dëshmi të re, për të ringjallur një shpresë që shkon përtej cikleve zgjedhore dhe përtej matematikave të pushtetit.

LRE ka një mision të qartë.

Dhe ky mision është forca më e madhe e saj.

Misioni është ai që e bën një lëvizje të qëndrojë edhe kur rrethanat duken të pafavorshme.

Misioni është energjia e brendshme që nuk shuhet, edhe kur përballesh me mohim, me mosbesim, madje edhe me padrejtësi.

Historia e politikës tregon se lëvizjet që kanë për bazë interesin, shpërbëhen sapo interesat shpërndahen.

Ndërsa lëvizjet që mbështeten mbi mision, kanë jetëgjatësi, sepse ato jetojnë jo vetëm në program, por në ndërgjegjen e atyre që besojnë.

Ky është sekreti i Rinisjes, ajo nuk është thjesht një organizatë, por një besëlidhje e re për Shqipërinë.

Në themel të saj qëndron doktrina e së djathtës humane, një doktrinë që e sheh politikën si art të shërbimit dhe jo si teknologji pushteti.

Kjo e djathtë nuk e sheh qytetarin si numër, por si person me dinjitet.

Nuk e sheh lirinë si treg, por si të shenjtë. Nuk e sheh besimin si dekor, por si themel.

Pikërisht sepse ka këtë doktrinë, LRE e ka të qartë rrugën e saj.

Kjo është kthjelltësia e qëllimit që e bën të ndryshme nga çdo parti tjetër.

Në një kohë kur politika shqiptare shpesh humbet në labirinthe pushteti, LRE ka kthjelltësinë e vizionit.

Kjo kthjelltësi është e domosdoshme, sepse një lëvizje pa qëllim të qartë rrezikon të tretet në mjegullën e kompromisit dhe të konformizmit.

Qëllimi i LRE është i prerë, të ringjallë një të djathtë autentike, të lidhur me vlerat e shenjta të kombit, me lirinë, me besimin, me dinjitetin dhe me përgjegjësinë qytetare.

Kthjelltësia e qëllimit është busulla që e mban lëvizjen në drejtimin e duhur.

Ajo nuk e lejon të shndërrohet në instrument të interesave të ngushta, as të bëhet pjesë e lojërave të pushtetit që shterojnë shpejt.

Në këtë kuptim, LRE është një lëvizje që e njeh mirë armiqtë e saj: apatinë, nihilizmin, konformizmin dhe klientelizmin.

Duke i njohur këta armiq, ajo e di edhe rrugën për t’i kapërcyer, përmes qëndrimit në mision, përmes kthjelltësisë së qëllimit dhe përmes fuqisë së komunitetit të saj.

Por asgjë nuk do të kishte kuptim pa energjinë e besimit.

Historia e lëvizjeve të mëdha, nga besimet fetare te përpjekjet politike, tregon se ajo që i bën të pathyeshme nuk është gjithmonë numri apo forca materiale, por besimi i patundur.

Besimi është ai që kthen pakicën në shumicë, të dobëtin në të fortë, të papërfillshmin në udhëheqës.

Lëvizja Rinisja e ka këtë energji.

Besimi i saj nuk është i verbër, por është besim i kthjellët, i ndërtuar mbi vlera.

Ai është besim që buron nga bindja se politika nuk është fati i të pasurve dhe i të fuqishmëve, por e drejtë dhe mundësi për çdo njeri të lirë.

Energjia e besimit është ajo që e bën komunitetin e LRE të qëndrojë i bashkuar, edhe kur përballë ka një realitet të vështirë.

Është ajo që e mban gjallë shpresën, edhe kur rruga është e gjatë.

Është ajo që e shtyn përpara çdo njeri të kësaj Lëvizjeje të mos ndalet, sepse dihet se e ardhmja nuk ndërtohet në një ditë, por me shumë ditë, me shumë qëndrime dhe me shumë sakrifica.

Sot LRE është një lëvizje që jeton nëpërmjet këtij trinomi: fuqia e misionit, kthjelltësia e qëllimit dhe energjia e besimit.

Ky trinomi është garancia që do ta bëjë Rinisjen të qëndrojë, të ecë dhe të ngjitet përtej pengesave të çastit.

Ky është arsenali më i madh i saj, më i fuqishëm se çdo pushtet i përkohshëm, më i qëndrueshëm se çdo intrigë e kohës.

E ardhmja e LRE është e sigurtë sepse nuk është e mbështetur mbi interesat që vjetërohen, por mbi vlerat që përjetësohen.

Është e sigurtë sepse nuk e ka frikë të vërtetën, përkundrazi e shpall me guxim.

Është e sigurtë sepse nuk e ka frikë rrugën e gjatë, përkundrazi e sheh si mundësi për të dëshmuar durim dhe karakter.

Prandaj unë besoj me gjithë mendimin dhe shpirtin tim se LRE do t’ia dalë mbanë.

Do t’ia dalë sepse nuk është thjesht një parti mes të tjerash, por është një thirrje për të gjithë ata që duan të ringjallin shpresën dhe të ndërtojnë një të ardhme me dinjitet.

Do t’ia dalë sepse mban mbi supe jo barrën e pushtetit, por barrën e misionit.

Do t’ia dalë sepse nuk e humb kthjelltësinë e qëllimit, edhe kur rruga bëhet e vështirë.

Do t’ia dalë sepse beson, dhe besimi është energjia që e bën të pamundurën të mundur.

Kjo është arsyeja pse LRE nuk është një aventurë politike, por një mision i madh kombëtar.

Dhe ky mision do të triumfojë, sepse në thelbin e tij mbart një të vërtetë që nuk mund të mposhtet, se e ardhmja e Shqipërisë është e lidhur me lirinë, me dinjitetin dhe me shpresën që kthehet në veprim.

Gent Sinani

NënKryetar i LRE