Aleanca nuk na shpëton nga vetja!

Nga Kristina Nano

Kryetare e LRE Rinisja

Një popull i vogël nuk bëhet i lirë vetëm sepse ka miq të mëdhenj.

Bëhet i lirë kur ndërton brenda vetes rendin, shtetin dhe karakterin publik që aleanca mund ta mbrojë, por nuk mund ta krijojë në vend të tij.

Kjo është e vërteta që Shqipëria duhet ta thotë me qetësi, Perëndimi nuk është strehë për papjekurinë tonë.

Është thirrje për karakter.

Europa nuk fillon në ceremoninë ku hapet një kapitull.

Fillon në çastin kur qytetari nuk poshtërohet më para derës publike.

Fillon kur ligji nuk vjen si nder, kur shërbimi nuk duket si mëshirë, kur administrata nuk pyet kë njeh, kur drejtësia nuk mat emrin para së drejtës.

Nëse Shqipëria flet europianisht, por qytetari vazhdon të kërkojë mik për të marrë atë që i takon, atëherë Europa mbetet fjalor.

Nuk bëhet jetë shtetërore.

Amerika është shtylla strategjike e lirisë shqiptare moderne.

Për ne, kjo nuk është gjuhë protokolli.

Është Kosovë. Është NATO.

Është siguri rajonale.

Është kujtesa se e drejta e një populli të vogël mund të mbijetojë kur morali gjen fuqi për ta mbrojtur.

Por edhe Amerika, me gjithë madhështinë e saj historike për ne, nuk mund të ndërtojë në vendin tonë karakterin që ne nuk pranojmë ta ndërtojmë vetë.

Në lidership, aleanca nuk është stoli identitare.

Është provë kapaciteti.

Një qeveri mund të bëjë fotografi me flamuj perëndimorë dhe prapë të mos sillet si Perëndim brenda vendit të vetë.

Një politikë mund të flasë për integrim dhe të ruajë korrupsionin, pabarazinë, garën e mbyllur, median e kapur dhe qytetarin e vogël përpara pushtetit.

Një shtet mund të kërkojë mbrojtje nga jashtë dhe të lërë të pambrojtur njeriun e vetë brenda.

Ky nuk është perëndimorizim.

Është pamje pa karakter.

LRE Rinisja e sheh Perëndimin si detyrë të brendshme, shtet që mban, qytetar që dëgjohet, garë që nuk mbyllet, drejtësi që nuk përkulet, lidership që nuk e përdor aleancën për të mbuluar mungesën e kapacitetit.

Europa na mëson si duhet të sillet shteti me qytetarin.

Amerika na kujton pse liria ka nevojë për fuqi.

Shqipëria duhet të ndërtojë karakterin publik që i bën të dyja të mos mbeten vetëm orientim në letër.

Perëndimi mund të na mbrojë nga armiqtë.

Nuk mund të na mbrojë nga vetja jonë e paformuar.

Ajo është puna që duhet ta bëjmë vetë.

Kristina Nano

Kryetare e LRE Rinisja