Kodi nuk shitet si reformë kur mbyll garën!

Nga Gent Sinani,

Nënkryetar i LRE Rinisja

Kodi Zgjedhor nuk është paketim për t’u shitur bukur.

Është dera nga hyn përfaqësimi politik.

Nëse dera ngushtohet, nuk ka rëndësi sa mirë quhet reforma.

Mund t’i veshësh fjalët me “lista të hapura”, “proporcional kombëtar”, “stabilitet”, “modernizim” apo “barazi vote”, në fund duhet parë çfarë i ndodh qytetarit, a i hapet fusha për të dëgjuar alternativa të reja, apo i rregullohet më bukur një garë ku hyrja ruhet nga të njëjtët aktorë?

Në marketing, paketimi mund ta sjellë njeriun te produkti një herë.

Por nëse produkti nuk mban atë që premton, besimi humbet.

Në politikë, kjo humbje është më e rëndë, sepse qytetari nuk humb vetëm një blerje. Humb besimin se pjesëmarrja ia vlen.

Kjo po ndodh me debatin mbi Kodin.

PS dhe PD e paraqesin formulën si reformë, ndërsa në thelb ruajnë arkitekturën që i ka mbajtur të mëdhenjtë të dukshëm dhe të rinjtë të varur nga leja e tyre.

Kur kësaj i shtohet edhe një forcë që shfaqet si e re, por pranon të bëhet pjesë e një formule që ngushton hyrjen për të tjerët, atëherë qytetari duhet të pyesë me qetësi, po sheh hapje reale, apo një pamje të re të vendosur mbi të njëjtën arkitekturë të vjetër?

Një listë mund të hapet dhe prapë fusha të mbetet e mbyllur.

Një prag mund të paraqitet si rend dhe prapë të bëhet mur.

Një reformë mund të flasë për qytetarin dhe prapë t’i kufizojë atij mundësinë për të krijuar përfaqësim të ri.

Problemi nuk është vetëm teknika.

Problemi është efekti.

Dhe efekti i një Kodi që rrit peshën e parasë, ekranit, emrit të trashëguar, patronazhit dhe rrjeteve të vjetra të pushtetit është i qartë, e bën garën më të shtrenjtë për qytetarin e lirë dhe më të sigurt për ata që e kanë zënë tashmë skenën.

LRE Rinisja nuk po kundërshton Kodin sepse kërkon privilegj.

Nuk kërkojmë rrugë të shkurtër.

Nuk kërkojmë dhuratë politike.

Kërkojmë që rregullat të mos jenë të ndërtuara për të mbrojtur monopolin e përfaqësimit.

Në një treg të ndershëm, produkti matet nga njeriu.

Në një demokraci të ndershme, alternativa matet nga qytetari.

Kodi që i trembet alternativës së re nuk është reformë.

Është paketim i mbylljes.

Dhe qytetari nuk ka nevojë për një mbyllje që duket më bukur.

Ka nevojë për një garë ku të dëgjojë, të krahasojë dhe të zgjedhë lirisht.

Gent Sinani

NënKryetar i LRE Rinisja