Perëndimi fillon kur pushteti pranon kufirin…

Të udhëtosh drejt Amerikës është fakt politik.

Edhe të flasësh në sallat e Europës është fakt politik.

Por as avioni, as tribuna nuk e bëjnë një vend perëndimor.

Këtë e përcakton mënyra si qeveriset vendi pasi delegacionet kthehen në shtëpi.

Përkatësia e Shqipërisë në Perëndim nuk është as stoli diplomatike, as kapital personal që një udhëheqës mund ta përdorë në betejën e brendshme.

Është zgjedhje qytetërimore e kombit.

Prova më e vështirë e kësaj zgjedhjeje nuk vjen kur pushtetin e mban njeriu të cilit i besojmë.

Vjen kur institucionet kalojnë në duart e atij që nuk do të donim ta kishte pushtetin.

Atëherë kuptohet nëse kemi ndërtuar shtet apo vetëm kemi administruar epërsinë tonë.

Një rend perëndimor nuk ndërtohet për fituesin e sotëm.

Rregullat që vlejnë vetëm sa kohë qeverisin njerëzit tanë nuk janë institucione, janë përparësi të përkohshme.

Institucioni ekziston pikërisht që autoriteti të mos fillojë e të mos mbarojë me njeriun që përkohësisht e drejton.

Prandaj nuk dua një Shqipëri që mat afërsinë me Amerikën me fotografi dhe përkatësinë europiane me konferenca.

Dua një Shqipëri që e ka bërë të pakthyeshme zgjedhjen e saj perëndimore dhe është aq e sigurt në identitetin e vetë, sa nuk ka nevojë ta marrë dinjitetin hua prej askujt.

Perëndimi fillon aty ku pushteti shqiptar, edhe kur e ka forcën në dorë, e di se fuqia nuk i jep vetvetiu të drejtën.

Arian Galdini