21 gushti: Rinisja dhe sfida qytetare “Rama ikën”

Të diel të mbarë ju uroj të gjithëve.

Më 21 gusht, LRE Rinisja nis përsëri udhëtimin e saj politik.

Në Hotel Tirana International do të zhvillojmë Kuvendimin tonë Programatik, ku do të rimarrim veprën e ndërprerë pas Marshimit të Dinjitetit të 21 gushtit 2021 dhe do të përcaktojmë drejtimin, përgjegjësitë dhe kalendarin e ri të Rinisjes.

Ky është objektivi ynë si parti politike e opozitës, e djathtë humane, shqiptare dhe perëndimore.

Por 21 gushti mund të mbajë edhe një sfidë më të gjerë se vetë LRE-ja.

Prej 29 majit, qytetarë të ndryshëm kanë dalë çdo ditë në protestë.

Në forma, gjuhë dhe grupe të ndryshme, një kërkesë është dëgjuar pareshtur, largimi i Edi Ramës nga drejtimi i qeverisë.

Kjo kërkesë meriton të dalë nga rituali i parullës dhe të hyjë në një proces të qartë, paqësor, kushtetues dhe politikisht të përgjegjshëm.

Për këtë arsye propozoj nisjen e një lëvizjeje qytetare me emrin:

Rama ikën

Jo më “Rama ik” si një urdhër i përsëritur që mbetet pa pasojë.

“Rama ikën” është një bindje qytetare dhe një proces politik, Shqipëria mund ta mbyllë një qeverisje të konsumuar dhe ta hapë Republikën pa dhunë, pa kaos dhe pa zëvendësuar një pronar me një tjetër.

Rama ikën që shteti të mos jetë pronë e qeverisë.

Rama ikën që opozita të mos jetë pronë e një njeriu.

Rama ikën që Kodi Zgjedhor të hapet, vota të çlirohet dhe qytetari të rikthehet në burimin e mandatit politik.

Rama ikën që ndryshimi të mos jetë thjesht ndërrim emrash, por ndryshim i marrëdhënies ndërmjet qytetarit, partisë dhe Republikës.

Kjo lëvizje nuk përjashton askënd si qytetar.

Çdo shqiptar, çdo opozitar, çdo subjekt politik, çdo drejtues, çdo aktivist dhe çdo njeri i lirë është i mirëpritur.

Por askush nuk vjen si pronar.

Askush nuk ka privilegj mbi qytetarin, mbi mikrofonin, mbi emrin apo mbi rezultatin e kësaj përpjekjeje.

Partitë mund të marrin pjesë.

Nuk mund ta marrin në pronësi.

Drejtuesit mund të ecin me qytetarët.

Nuk mund t’i kthejnë ata në dekor të ambicies së tyre.

Unë, Arian Galdini, jo në emër të LRE-së si parti, por si qytetar dhe themelues i saj, marr përsipër përgjegjësinë për të hapur dhe udhëhequr fazën e parë të këtij procesi.

Jo si pronar i tij.

Jo si njeri që kërkon kurorë.

Por si qytetar që pranon të dalë përpara, të mbajë barrën e vendimit, t’i nënshtrohet një rregulli publik dhe të japë llogari për çdo hap.

Më 21 gusht, në orën 18:00, në sheshin “Skënderbej”, ftoj çdo qytetar që e beson këtë mundësi.

Ftoj opozitën e madhe dhe të vogël, të vjetër dhe të re.

Ftoj çdo njeri që kërkon largimin e Edi Ramës, por nuk pranon që Shqipëria të kalojë nga pronësia e njërit te pronësia e tjetrit.

Ky nuk është plebishit për emrin tim.

Është provë për një ide:

A mund të bashkohen shqiptarët rreth një kërkese të qartë, pa u bërë pronë e një partie, e një mikrofoni ose e një udhëheqësi?

Nëse kjo thirrje merr përgjigje qytetare, do të nisim një marshim paqësor dhe kushtetues drejt Kryeministrisë, nën një kod publik sjelljeje dhe përgjegjësie.

Pas aktit qytetar, Kuvendimi Programatik i Rinisjes do të zhvillohet në çdo rast, sepse sheshi hap energjinë, ndërsa institucioni i jep asaj drejtim, kufij dhe vazhdimësi.

Ne nuk premtojmë një mrekulli të çastit.

Premtojmë diçka më të vështirë:

të mos e shesim objektivin,

të mos e përdorim qytetarin si shkallë,

të mos e kthejmë lëvizjen në pronë personale,

të mos ikim nga përgjegjësia kur mbyllen kamerat,

dhe të kërkojmë ndryshim që pranohet nga qytetarët, respekton Kushtetutën dhe fiton besueshmëri përpara aleatëve tanë perëndimorë.

Më 21 gusht, Rinisja ka Kuvendimin e vetë.

Shqipëria mund të ketë edhe një fillim më të gjerë.

Rama ikën. Republika hapet. Qytetari rikthehet.

Arian Galdini