LRE lindi nga thirrja e shpresës dhe do të qëndrojë nga fuqia e besimit!

Nga Kristina Nano

Anëtare e Kryesisë së LRE

Ka momente në histori kur një zë i vetëm është i mjaftueshëm për të hapur një udhë. LRE - Lëvizja Rinisja lindi nga një thirrje shprese në një kohë kur shoqëria shqiptare ishte zhytur në lodhje dhe mosbesim.

Në vitin 2020, kur kriza morale, politike dhe sociale dukej se kishte mbyllur çdo horizont, u ndez një togfjalësh i thjeshtë, por i fuqishme: “Lëvizja e Re”.

Ishte thirrja për të filluar sërish, për të besuar se politika mund të jetë shtëpi e vlerave dhe jo arenë e pazarit.

Nga ai çast, LRE mori trajtë jo si parti në kuptimin klasik, por si një besëlidhje e ndërgjegjes, si një përpjekje për të rikthyer të djathtën shqiptare në natyrën e saj autentike: humane, dinjitoze dhe besimtare.

Çdo lëvizje politike ka një themel mbi të cilin qëndron. Për partitë tradicionale, ky themel shpesh është pushteti, interesi, apo rrjeti i klientelës.

Për LRE, themeli ka qenë gjithmonë shpresa.

Shpresa nuk është naivitet.

Ajo është akti më i lartë i besimit se njeriu nuk është i dënuar të mbetet peng i së shkuarës.

Shpresa është energjia që i jep kuptim sakrificës dhe që e bën njeriun të besojë se mund të ngrihet mbi rëniet e tij.

LRE lindi sepse dikush guxoi të besonte se Shqipëria meriton një politikë më të pastër, një të djathtë më humane dhe një besëlidhje më të vërtetë me qytetarët.

Nga “Këndi i Shpresës” e deri në ditën e sotme, kjo fjalë ka qenë busull.

Ajo e ktheu LRE në një hapësirë ku qytetarët mund të shohin veten pa turp, pa frikë, pa iluzione të rreme.

Shpresa ndez fillimin, por ajo që e bën një lëvizje të qëndrojë është besimi.

Besimi nuk është thjesht bindje politike, është akt morali.

Është aftësia për të qëndruar në parim edhe kur stuhia të tundon, edhe kur interesi të tërheq, edhe kur shumica zgjedh rrugën më të lehtë.

Besimi i LRE nuk ka qenë kurrë besim në një individ, por besim në një doktrinë.

Doktrina e neoshqiptarizmit, e rikthimit në vlera dhe e ndërtimit të së djathtës autentike shqiptare është garancia që kjo Lëvizje nuk do të shuhej me një emër, por do të jetojë si kulturë politike.

Dorëheqja e themeluesit Arian Galdini nga drejtimi i Lëvizjes është pikërisht dëshmi e këtij besimi.

Ajo nuk e dobësoi LRE, përkundrazi e forcoi, sepse tregoi se organizata nuk qëndron mbi një njeri, por mbi parime.

Besimi është ky, të shohësh përtej individit dhe të mbash gjallë flakën e misionit.

LRE nuk është thjesht një projekt elektoral. Ajo është përpjekja për ta rikthyer të djathtën shqiptare në natyrën e saj më të pastër.

E djathta humane nuk e sheh qytetarin si klient të politikës, por si bashkudhëtar në një udhë të përbashkët.

Në thelbin e saj, kjo filozofi ngrihet mbi tri shtylla:

1. Liria me përgjegjësi, sepse liria pa përgjegjësi shndërrohet në anarki, ndërsa përgjegjësia pa liri kthehet në shtypje.

2. Dinjteti i njeriut, çdo politikë që shkel dinjitetin e njeriut është e padrejtë, pavarësisht shifrave që sjell.

3. Besëlidhja morale, politika nuk është kontratë pushteti, është besëlidhje e ndërgjegjes midis qytetarit dhe përfaqësuesit të tij.

Kjo është arsyeja pse LRE nuk hyn në pazare me pushtetin, as nuk pranon të bëhet surrogato e opozitës së vjetër.

Ajo qëndron në rrugën e vet, sepse ka filozofi që e udhëheq.

Historia e politikës shqiptare është e mbushur me projekte që lindën me entuziazëm dhe u shuan me zhgënjim.

Çfarë e bën LRE ndryshe është fakti se ajo nuk është e lidhur me cikle pushteti, por me një mision moral.

Vazhdimësia e LRE nuk matet me mandatet që fiton, por me shpresën që ruan dhe me besimin që kultivon.

Çdo anëtar i saj është i thirrur jo thjesht për të marrë pjesë në zgjedhje, por për të dëshmuar një mënyrë tjetër të të bërit politikë.

Në këtë kuptim, LRE është një shkollë karakteri dhe jo vetëm një parti.

Ky është dallimi që garanton vazhdimësinë: kur një lëvizje ngrihet mbi vlera, ajo nuk vdes me ciklin elektoral.

Kur ngrihet mbi individin, ajo bie sapo individi largohet. LRE ka zgjedhur të parën.

Lëvizja Rinisja lindi nga thirrja e shpresës dhe do të qëndrojë nga fuqia e besimit.

Ky është mësimi i saj për shoqërinë shqiptare, se politika mund të jetë vend i vlerave dhe i moralit, jo i pazareve.

Se e djathta nuk është armë për të sunduar, por rrënjë për të mos u shkulur.

Në një kohë ku shumica shohin politikën si lojë interesi, LRE është kujtesë se politika mund të jetë akt i ndërgjegjes.

Dhe ndërgjegja nuk mposhtet.

Ajo mund të vonohet, mund të goditet, por kurrë nuk shuhet.

Kjo është arsyeja pse LRE nuk është thjesht një alternativë.

Ajo është dëshmia se e djathta humane ka lindur sërish në Shqipëri.

Dhe kjo lindje nuk është më e kthyeshme.

Kristina Nano

Anëtare e Kryesisë së LRE