Para se të rinisim bashkë…

Dua që ta dini:

Asnjë fjalë, asnjë deklarim, asnjë qëndrim i imi, i shprehur, deklaruar, shpallur, shpalosur unë si Arian Galdini e ne si LRE Rinisja, nuk ka ndryshuar e as lëvizur asnjë inç.

Ka lëvizur koha, e ndoshta na la lënë pas.

Kanë lëvizur “ujërat e ngjarjet e shoqërisë shqiptare”, e ndoshta na kanë zhytur thellë në harresë e mosdukje.

Kanë lëvizur grupet politike, sociale, konjukturat, e interesat në mbarë vendin tonë të kujtdo e të gjithëve, e ndoshta ne kemi mbetur mbrapa a të huaj, të thyer a të copëtuar.

Kanë lëvizur vëmendjet, dashuritë, pëlqimet e njerëzve e shoqërisë, e ndoshta ne kemi mbetur në periferi e të lënë mënjanë e larg syve e mendjeve e zemrave të shumicës dërrmuese të shqiptarëve.

Kanë lëvizur lart e fort, shumë “Yje që janë ngjitur në maja” plot sukses e popullaritet, e ndoshta ne jemi dukur të tretur, mbaruar, tejkaluar.

Por megjithatë, asnjë fjalë e jona, asnjë qëndrim i yni, asnjë deklaratë a vendim, asnjë parim i shpallur nga ne, as ka ndryshuar e as është tjetërsuar, as ështe modifikuar, e as është “vrarë nga koha”.

Përkundërazi, gjithçka që ka lëvizur bashkë me kohën, është konsumuar bashkë me kohën.

Ne që e ngrimë veten krejt jashtë loje e jashtë kohe, sot po vërtetohemi plotësisht nga koha.

Sepse nuk lëvizëm.

U mbuluam, u zhytëm.

Por nuk lëvizëm.

Dështuam, thyem turinjtë, u perceptuam e u interpretuam si të mbaruar e groposur…

Na braktisën shumica dërrmuese.

Na quajtën zhgënjim e dështim, shumica dërrmuese.

Por koha po na vërteton.

E koha po na thërret.

Pse?

Sepse ne nuk lëvizëm, nuk ndryshuam, nuk u tjetërsuam, nuk u tërhoqëm, nuk u joshëm, nuk u lodhëm, nuk u shitëm, nuk u dorëzuam.

Prandaj jemi sot gati për tia Rinisur.

Sepse ne jemi Fari.

Po po, ne jemi Fari.

Ne jemi LRE, ne jemi Rinisja.

Pikë