PISA, statistika nuk ka detyrë t’i japë të drejtë Qeverisë…

Edi Rama e paraqiti PISA 2025 si përparim të jashtëzakonshëm dhe rikthim në ecurinë rritëse.

OECD-ja raporton rezultatet, por jo trendin për Shqipërinë.

Shkollat me më pak se 21 nxënës të përshtatshëm për PISA-n nuk u kontaktuan.

Të dhënat e mëparshme sugjerojnë dallime nga pjesëmarrëset në përbërjen shoqërore-ekonomike dhe rezultatet akademike, boshllëku i mbulimit nuk korrigjohet plotësisht statistikisht.

Përmirësimi nuk përjashtohet.

Por Rama nuk mund ta përdorë autoritetin e raportit për pikët dhe ta shpërfillë për kufizimet.

Për nxënësit e përfaqësuar nga kampioni, nivelin 2 ose më lart e arritën 55% në matematikë kundrejt 65% mesatarisht në OECD, 61% në shkencë kundrejt 74%.

Në lexim, 50% kundrejt 69%: afërsisht gjysma mbeti nën nivelin bazë.

Fëmijëve të shkollave të papërfshira nuk ua dimë rezultatin nga ky test.

Detyrimin ndaj tyre e dimë.

Doktrina jonë e Shqiptarizmit nuk e lë jashtë kujdesit fëmijën që mbeti jashtë shifrës.

Prindërimi i vë këtij detyrimi afat, fëmijës i duhet ndihma këtë vit, jo vetëm shpjegimi vitin tjetër.

Qeverisë Rama i kërkoj korrigjim publik dhe një plan të financuar për leximin, me ndihmë për nxënësit e mbështetje për mësuesit.

Prindi duhet të dijë kur nis ndihma, si ndiqet përparimi dhe kujt t’i kërkojë rishikimin e saj kur ajo nuk mjafton.

Korrigjimi i fjalimit nuk e përmbush detyrimin ndaj klasës.

Shkolla duhet ta aftësojë të riun ta lexojë kontratën para se ta firmosë, të gjejë kushtin që përmbledhja e la jashtë dhe të vendosë vetë.

Të njëjtën zotësi duhet të ketë për raportin që ia përmbledh Kryeministri.

Fëmija nuk i detyrohet Ramës besnikëri.

Rama i detyrohet fëmijës një shkollë që i jep zotësinë ta gjykojë edhe atë.

Arian Galdini