Pse shqiptarët duhet t’i kthejnë sytë e besimit dhe shpresës te LRE – Rinisja?

Nga Kristina Nano

Kryetare e LRE - Rinisja | Doktorante në Leadership, James Madison University (JMU), SHBA

Shqipëria nuk vuan nga mungesa e fjalëve, por nga mungesa e peshores që i mat ato. Vendi ynë ka ecur gjatë me parulla, ndërsa njerëzit kanë pritur prova.

Sot kërkohet një busull e re, jo kush thotë më shumë, por kush mban më drejt.

Kjo është arsyeja e parë përse besimi dhe shpresa duhen kthyer te LRE - Rinisja, sepse ne nuk kërkojmë duartrokitje, kërkojmë matje, nuk kërkojmë turmë, kërkojmë ndërgjegje.

LRE - Rinisja është parti opozitare dhe e djathtë, jo një etiketë, por një mënyrë e të menduarit për shtetin dhe njeriun.

Ne përfaqësojmë të djathtën humane, konservatore në parime, moderne në mendim, atdhetare në shpirt.

Ne besojmë se Zoti është themeli i moralit publik, se jeta është e shenjtë, se familja është qeliza e lirisë, se dinjiteti njerëzor është kufiri i padiskutueshëm i çdo politike.

Ja arsyet pse LRE - Rinisja është shtëpi për shqiptarët e ndërgjegjes:

a) Sepse ne ofrojmë një vizion me rrënjë e me horizont.

Neoshqiptarizmi ynë nuk është slogan kulturor.

Është gramatika e identitetit modern shqiptar, ruajtje e kujtesës, përkthim i vlerave të besës dhe mikpritjes në standarde të shtetit të së drejtës, hapje e mendjes drejt Perëndimit pa humbur shpirtin. Kombëtarizmi ynë nuk kërkon armiq, kërkon pjekuri politike, gjuhë e qartë, buxhet i ndershëm, qytetari me pjesëmarrje.

b) Sepse ne e shohim politikën dhe qeverisjen me sy prindi.

Prindërimi nuk është metaforë tek ne, është metodë politike, çdo ligj, buxhet, projekt shkon në testin e thjeshtë, si e prek fëmijën, familjen, punën, të sëmurin, mjeshtrin, sipërmarrësin.

Kjo është mënyra me të cilën liria nuk kthehet në alibi, por në përgjegjësi.

c) Sepse ne e kuptojmë forcën si dalëzotësi, jo si zhurmë.

Dalëzotësia është virtyti ynë, të mbrosh pa poshtëruar, të qortosh pa u përçudnuar, të rregullosh pa u vetëlavdëruar.

Kjo është etika konservatore e qëndrimit, shteti që pranon kufij, tregu që pranon rregull, njeriu që respekton tjetrin.

d) Sepse ne nuk e masim zhvillimin me volum, por me peshë.

Ekonomia pa moral është zhurmë me amplifikator.

LRE - Rinisja propozon ekonominë e karakterit, fitim nga shërbimi, jo nga afërsia me pushtetin, konkurrencë pa kosto të fshehura, besueshmëri si monedhë kombëtare që nuk zhvleftësohet.

Turizmi i identitetit, kultura si kapital i gjallë, teknologjia që i jep krah punës, jo që e zëvendëson.

Pse të djathtët e ndërgjegjes e kanë vendin te Rinisja?

Shqiptarët e lirë janë lodhur nga riciklimi i elitave, nga rotacioni pa përmbajtje, nga spektaklet që nuk lënë gjurmë.

LRE - Rinisja nuk kërkon t’i bjerë me grusht tryezës së vjetër, kërkon të ndryshojë tryezën, procedura të hapura, afate të lexueshme, shërbime me kontratë të qartë me qytetarin.

Opozitarizmi ynë nuk është panik i përditshëm, është korrigjim i qëndrueshëm i kursit.

Ne jemi qartësisht opozitë me të majtën dhe qeverisjen që ka privatizuar përfitimet dhe ka socializuar humbjet, por ne jemi po aq opozitë me çdo moral të shitur.

Nuk kemi interes të thyejmë Republiken, kemi mision të thyejmë Klubin e Pakicave Plaçkitëse duke rikthyer kufijtë, qartësinë, besueshmërinë.

Çfarë do të bëjmë ndryshe (thelbi praktik në tri fjalë)?

Dinjitet. Punë. Besim.

Dinjitet, çdo vendim i gjykuar me arsyetim publik, çdo shërbim me afat dhe përgjegjësi, çdo shpenzim me emër, qëllim, provë.

Punë, Korridore vlere në çdo qark (prodhim - përpunim - treg), Paga e Dinjitetit si busull fiskale, lehtësim vetëm me kontratë të bardhë e trajnim real.

Besim, buxhet i qytetarisë (pjesëmarrje direkte e banorëve në 5% të fondeve vendore), atlas i meritës publike (12 tregues të përbashkët), gjykim që shpjegon, jo që fshihet.

Këto nuk janë pankarta, janë instrumente të një kulture të re shteti. Kjo është e djathta humane në veprim.

Pse besimi duhet kthyer te Rinisja tani?

Sepse Shqipëria nuk ka mungesë talenti, ka mungesë mase.

Rinisja e rikthen masën, rikthen kufijtë, rregullin, maturinë, respektin për ligjin dhe kohën e tjetrit.

Sepse Shqipëria nuk ka mungesë historie, ka mungesë kujtese operative.

Ne e kthejmë traditën në manual pune, jo në dekor fjalimesh.

Sepse Shqipëria nuk ka mungesë shprese, ka mungesë besueshmërie.

Dhe besueshmëria rindërtohet vetëm në një Komunitet të Ndërgjegjes dhe Vlerave.

Ky komunitet quhet LRE - Rinisja, për Zotin, jetën, familjen, lirinë dhe dinjitetin njerëzor, konservatore në themele, atdhetare në qëllim, perëndimore në aleanca.

Si ekonomiste, e di se tregu ka nevojë për besim po aq sa për kapital.

Si studiuese e lidershipit, e di se shteti ka nevojë për karakter po aq sa për ligje.

Si shqiptare, e di se pa Zot, pa familje, pa prindërim dhe pa kombëtarizëm të matur, politika kthehet në teknikë pa shpirt.

Rinisja nuk kërkon të sundojë. Kërkon të udhëheqë me shembull.

Ne nuk kërkojmë të na besoni nga zemërimi ndaj tjetrit, kërkojmë të na besoni nga prova e vetes sonë.

Ktheni sytë te LRE - Rinisja nëse doni një opozitë që ndriçon, jo ndez, një të djathtë që fisnikëron, jo përçan, një politikë që ndërton, jo konsumon.

Ktheni sytë te Rinisja nëse doni që fëmijët tuaj të mësojnë se liria është përgjegjësi, jo leje, dhe se dinjiteti është ligj i pashkruar.

Rruga ka një emër të thjeshtë dhe të madh: Rinisja.

Ju pres aty ku politika rikthehet në ndërgjegje dhe shteti rikthehet në kujdes.

Sepse Shqipëria e nesërme do të ngrihet nga ata që shtojnë peshë, jo zë.

🇦🇱

Kristina Nano

Kryetare e LRE - Rinisja