Shteti duhet të përgjigjet…

Qytetari nuk duhet të ketë mik në qeveri që shteti t’i përgjigjet.

Kjo është një prej padrejtësive më të zakonshme shqiptare, ke një të drejtë, paraqet kërkesën, dorëzon dokumentet, dhe pastaj fillon kërkimi për njeriun që njeh njeriun.

Kjo duhet të marrë fund.

Po punojmë për një parim të thjeshtë të LRE Rinisjes, të drejtën e qytetarit për përgjigje nga shteti.

Kur i drejtohesh një institucioni, duhet ta dish kush e mori çështjen, brenda cilit afat duhet të përgjigjet, ku ndodhet kërkesa dhe kush mban përgjegjësi kur afati shkelet.

Jo një portal tjetër që regjistron hallin dhe pastaj e humbet njeriun pas ekranit.

Një e drejtë.

Me afat. Me gjurmë. Me përgjegjës. Me ankim. Me pasojë kur administrata nuk kryen detyrën.

Teknologjia mund ta bëjë shtetin më të shpejtë.

Inteligjenca artificiale mund ta ndihmojë të përpunojë mijëra kërkesa.

Por vendimi që prek jetën e qytetarit duhet të ketë gjithmonë një përgjegjësi njerëzore pas tij.

Sepse Republika nuk matet vetëm nga ligjet që miraton.

Matet edhe nga ajo që ndodh pasi një njeri troket në derën e saj.

Dhe ndryshimi që dua është i prerë:

Nga qytetari që kërkon njeri për të zgjidhur hallin, te shteti që ka detyrimin t’i përgjigjet qytetarit.

Jo si nder.

Si e drejtë.