Demokracia nuk vdes me një apo disa e as me shumë ligje

Nuk është e lehtë të jesh qytetar në një vend ku çdo ditë të bëjnë të ndihesh i panevojshëm.

Jo sepse nuk je i aftë.

Jo sepse nuk e do këtë vend.

Por sepse gjithçka rreth teje është ndërtuar që të ndjesh se zëri yt nuk bën diferencë.

Kur zgjedhjet shihen si ceremoni, jo si vendimmarrje.

Kur fjalët e tua nuk dëgjohen në asnjë institucion, përveç vetes tënde.

Kur përfaqësimi ndodh në letra, por jo në realitet.

Kur çdo ditë ndihesh i tepërt në vendin tënd, dhe megjithatë s’e lë, sepse ndihesh pjesë e tij.

Kjo është sfida më e madhe, të mos dorëzohesh në një sistem që punon për të të lodhur.

Të mos e humbasësh përulësinë kur e sheh se të paditurit ngjiten.

Të mos e humbasësh dinjitetin kur sheh se ndershmëria nuk të shpërblehet.

Të jesh qytetar i mirë në një vend që nuk të do të tillë, kjo është vepra më e madhe që mund të bësh.

Sepse nga ky qëndrim fillon çdo kthesë.

Nuk bëhet me trumbetë. Bëhet me një zemër që nuk pranon të shitet.

Me një ndërgjegje që nuk e lë askënd të flasë në emër të saj.

Demokracia nuk vdes me një apo disa e as me shumë ligje.

Ajo zbehet kur njerëzit ndalojnë së besuari që mund ta mbajnë gjallë.

Ndaj, le të mos pushojmë së qenuri të kthjellët e besimplotë tek fuqia brenda nesh. As për një ditë.

Mirëmëngjesi e bekime pafund për të gjithë🙏🫶